Ырчы Улукманапо күзөтчүнү сабады делген маалыматтар боюнча үн катты

Кыргызстандын белгилүү рэп ырчысы Улукманапо 65 жаштагы бала бакчадагы күзөтчү менен болгон окуя боюнча үн катты. Ал өзүнүн Инстаграмдагы баракчасына сүрөт киргизип, ур-токмок болгон эместигин жазып чыкты.

"ЖМКда чагылдырылган кырдаалды тактап кетким келет. Акыркы кабарларга байланыштуу айта кетейин, эч кандай ур-токмок болгон эмес. Бул таптакыр жалган маалымат. Баары түшүнбөстүктөн улам болуп, ортобузда жөн гана сөз талаш чыгып, бири-бирибизди туура түшүнбөй калдык. Айрым ЖМКлар маалыматты бурмалап, чындыкка дал келбеген нерселерди тараткандыгы өкүнүчтүү. Бирок биз байке (күзөтчү) экөөбүз бул маселени тынчтык жол менен чечтик. Мен ага айтылган сөздөрүм үчүн кечирим сурадым. Түшүнүүңүздөр жана колдооңуздар үчүн рахмат. Бардыгы өз ордуна келет деп ишенем", - деп калтырган өз билдирүүсүндө ырчы.

Айта кетсек, буга чейин Ленин РИИБине бала бакчалардын биринин күзөтчүсү арыз менен кайрылып, анда аны белгилүү кыргыз рэпери сабагандыгы айтылды.