Жалал-Абадда облустук көркөм сүрөт жатак-мектеби ачылды

Бүгүн, 30-августта президент Садыр Жапаров Жалал-Абад облусуна болгон жумушчу сапарынын алкагында облустук көркөм сүрөт мектеп-интернатынын ачылышына катышты.

Мамлекет башчысынын басма сөз кызматы билдиргендей, имарат 1906-жылы курулган жана акыркы жылдары пайдаланууга жараксыз, авариялык абалда болуп калган. Жаңы көркөм сүрөт мектебинин курулушу 2024-жылдын аягында башталган. Долбоор 100 окуучуга ылайыкталган окуу корпусун курууну карайт. Үч кабаттуу имарат төрт блоктон турат.

Мамлекет башчысы заманбап кабинеттерди, жабдылган чеберканаларды, көркөм галереяны жана жатакананы көрүп чыкты. Ошондой эле мугалимдер, окуучулар менен баарлашып, аларга чыгармачылык ийгиликтерди жана тандаган багыттарындагы жаңы жетишкендиктерди каалады.

Мектептин бүтүрүүчүлөрү Улуттук көркөм сүрөт академиясында тандаган багыттары боюнча окуусун улантып, живописчи, скульптор, дизайнер-архитектор, графикалык дизайнер, искусство таануучу, костюм дизайнери, керамист сыяктуу кесиптерди өздөштүрүшөт.

Айта кетсек, өткөн жылдын 26-декабрында аталган окуу жайдын мезгил кутусу салынган.