Трамп соттун анын тарифтерин мыйзамсыз деп тапкан чечимин ката деп атады

АКШнын президенти Дональд Трамп апелляциялык сот анын башка өлкөлөргө киргизген соода тарифтеринин көбүн мыйзамсыз деп тапкан чечимин туура эмес деп атады.

"Бардык тарифтер азыркыга чейин күчүндө. Бүгүн өтө эле бейтарап эмес апелляциялык сот биздин тарифтер жокко чыгарылышы керек деп туура эмес билдирүү жасады, бирок алар АКШ акыры жеңишке жетерин жакшы билишет", — деп жазылат Трамптын Truth Social социалдык түйүнүндөгү билдирүүсүндө.

Трамп тарифтердин жокко чыгарылышын АКШ үчүн "катастрофа" деп атап, ал мамлекетти алсырата турганын жана жок кылышы мүмкүн экенин кошумчалады. Анын айтымында, Вашингтон башка өлкөлөр тарабынан салынган "адилетсиз соода тарифтерине" мындан ары чыдабайт. Ошондуктан анын тарифтери америкалык өндүрүүчүлөргө жана компанияларга жардам берүүчү эң жакшы курал болуп эсептелет.

Reuters агенттиги 30-августта кабарлагандай, АКШнын апелляциялык соту Трамптын тарифтеринин көбүн мыйзамсыз деп тааныган. Ошол эле учурда, бул тарифтер 2025-жылдын 14-октябрына чейин күчүндө калат, бул убакыт ичинде Трамптын командасы АКШнын Жогорку Сотуна даттанууга мүмкүнчүлүк алат.