Путин менен Эрдоган 1-сентябрда Украина маселесин талкуулашат

Орусиянын президенти Владимир Путин менен Түркиянын башчысы Режеп Тайып Эрдоган 1-сентябрда Кытайдын Тяньцзинь шаарында өтө турган Шанхай кызматташтык уюмунун саммитинин алкагында эки тараптуу жолугушуу өткөрүшөт. Бул тууралуу Орусия президентинин жардамчысы Юрий Ушаков билдиргенин чет элдик басылмалар жазышууда.

Жолугушууда эки өлкөнүн кызматташтыгы, дүйнөлүк саясат, ошондой эле Украина жана Жакынкы Чыгыштагы жаңжалды жөнгө салуу маселелери талкууланат.

"Бул жолугушуу 2025-жылы эки лидердин биринчи ирет бетме-бет сүйлөшүүсү болот. Буга чейин Путин менен Эрдоган телефон аркылуу активдүү байланышта болуп турушкан", — деди Ушаков.

Айта кетсек, буга чейин Кытайдын Тяньцзинь шаарында өтө турган Шанхай кызматташтык уюмунун саммитине өлкө башчысы Садыр Жапаров да бара тургандыгы белгилүү болгон.