Жалал-Абаддагы жаңы бокс академиясына президент менен дүйнөгө белгилүү мушкер Николай Валуев барды

Жалал-Абад шаарындагы бокс академиясына үч бокс залы, административдик имарат, 300 орундуу заманбап спорт зал, ошондой эле 27 орундуу жатакана кирет. Академия спортчуларды даярдоо жана ар кандай деңгээлдеги мелдештерди өткөрүү үчүн ыңгайлуу шарттарды камсыз кылат.

Бүгүн, 30-августта президент Садыр Жапаров белгилүү мушкер, оор салмактагы дүйнө чемпиону, Орусиянын Мамлекеттик Думасынын депутаты Николай Валуев менен барып, жеринде таанышып чыгышты.

Курулуш Жалал-Абад шаарынын мэриясынын буюртмасы менен ишке ашырылды. Каржылоо толугу менен республикалык бюджеттен жүргүзүлдү. Долбоордун жалпы наркы 192 миллион сом.

Мамлекет башчысы спорт залдарды көрүп чыгып, жаш мушкерлер, машыктыруучулар менен баарлашты. Ысым жазылган бокс кол каптарына кол тамгасын коюп, чогуу сүрөткө түштү.

Ал эми Николай Валуев жаш спортчулар үчүн мастер-класс өткөрдү.