SUPER.KG порталы жалпы кыргызстандыктарды Эгемендүүлүктүн 34 жылдыгы менен куттуктайт

Урматтуу кыргызстандыктар, SUPER.KG порталынын сүйүктүү окурмандары!

Сиздерди Кыргызстандын Эгемендүүлүгүнүн 34 жылдык майрамы менен чын жүрөктөн куттуктайбыз!

1991-жылы 31-августта элибиз өз тагдырын өзү аныктап, эгемен мамлекет болуу жолуна түштү. Бул күн ата-бабаларыбыздын кылымдар бою кыялданган эркиндикке жеткен, тарыхый чечим кабыл алынган улуу күн. Эгемендүүлүк — бул жөн гана макам эмес, бул биздин маданиятыбыз, тилибиз, улуттук баалуулуктарыбыз жана келечек муунга болгон ишенимибиз.

34 жыл ичинде өлкөбүз ар кандай сыноолордон өттү. Бирок кыргыз эли ар дайым сабырдуулук, биримдик жана үмүт менен алдыга умтулуп келди. Бүгүнкү күндө биз баарыбыз, жаш-кары дебей, Кыргызстандын тынчтыгы, өнүгүүсү жана гүлдөп-өсүшү үчүн эмгектенип келебиз.

Бул ыйык күндө мекенибизге болгон сүйүүбүздү дагы бир жолу даңазалап, эркиндигибизди, улуттук биримдигибизди жана ынтымагыбызды чыңдайлы. Ар бир жараныбыз татыктуу жашоодо, өз мекенинде бакубат турмуш кечирсин!

Кыргызстандын туусу дайыма бийик желбиреп, эгемендүүлүгүбүз түбөлүктүү болсун!
Майрамыңыздар менен, урматтуу мекендештер!