Эгемендүүлүккө 34 жыл. Кыргызстандыктарга алгачкы куттуктоо Кытай менен Орусиядан келди

Бүгүн, 31-августта Кытай Эл Республикасынын төрагасы Си Цзиньпин жана Орусиянын лидери Владимир Путин президент Садыр Жапаровду жана Кыргызстан элин Эгемендүүлүк күнү менен куттуктады. Бул тууралуу президенттин басма сөз кызматы билдирди.

“Сиздин жетекчилигиңиз астында Кыргызстан улуттук өнүгүүдө тынымсыз жаңы жана кубандырган ийгиликтерге жетишүүдө. Жакында эле Кыргыз Республикасын 2030-жылга чейин өнүктүрүүнүн улуттук программасы бекитилди, бул жаңы Кыргызстанды куруунун планын түздү. Достук мамиледеги коңшу жана жаңы доордогу ар тараптуу стратегиялык өнөктөш катары Кытай тарап буга чын жүрөктөн кубанат.

Быйыл жыл башынан бери биз сиздер менен эки жолу ийгиликтүү жолугушууларды өткөрүп, Кытай менен Кыргызстандын ортосундагы ар тараптуу кызматташтык боюнча маанилүү консенсуска жетишип, кытай-кыргыз мамилелерин өнүктүрүүнүн жаңы планын түздүк. Кытай тарап кыргыз тарап менен биргелешип саясий өз ара ишенимди чыңдоого, бири-бирибизди бекем колдоого жана Кытай менен Кыргызстандын тагдыры бир коомчулугун түзүү максатында "Бир алкак, бир жол" долбоорун жогорку сапатта биргелешип курууга даяр.

Кыргызстанга гүлдөп-өсүүнү, ал эми элине бакыт жана бакубатчылык каалайм", - деп айтылат Кытайдын төрагасы Си Цзиньпин куттуктоо телеграммасында.

Ал эми Орусиянын өлкө башчысы эки өлкөнүн мамилеси стратегиялык өнөктөштүк жана союздаштык духунда курулуп жаткандыгын белгиледи.

"Улуттук майрам – Кыргыз Республикасынын Эгемендүүлүк күнү менен чын жүрөктөн куттуктоолорумду кабыл алыңыз.

Мамлекеттерибиздин ортосундагы мамилелер стратегиялык өнөктөштүк жана союздаштык духунда курулууда. Ар кандай тармактарда эки тараптуу кызматташтык, ЕАЭБ, ЖККУ, КМШ, ШКУ жана башка көп жактуу түзүмдөрдүн алкагында конструктивдүү өз ара аракеттенүү ийгиликтүү өнүгүүдө.

Биргелешкен аракеттерибиз менен биз, албетте, Орусия-Кыргыз байланыштарынын бүтүндөй комплексин мындан ары да кеңейтебиз. Бул биздин достук мамиледеги элдерибиздин кызыкчылыктарына толук жооп берет, Евразия мейкиндигинде коопсуздукту жана туруктуулукту камсыз кылуу нугунда бара жатат.

Сизге чың ден соолук жана ийгиликтерди, ал эми жарандарыңыздарга бакубатчылык жана гүлдөп-өнүгүүнү каалайм", – деп айтылат Путиндин куттуктоо телеграммасында.