Тяньцзинь шаарында кыргыз-кытай кызматташтыгынын алкагында 10 документке кол коюлду

Бүгүн, 31-августта президент Садыр Жапаров Кытайдын төрагасы Си Цзиньпин менен Тяньцзинь шаарында жолугушуусунда бир катар документтерге кол коюлду.

Алар:

1. Министрлер кабинети менен Кытайдын Өкмөтүнүн ортосундагы кайтарымсыз жардам көрсөтүү жөнүндө макулдашуу;

2. Министрлер кабинети менен Кытайдын Өкмөтүнүн ортосундагы кат алмашуу жолу менен түзүлгөн "Бедел" автомобиль өткөрүү пунктун куруу жана техникалык жабдуу" долбоорунун техникалык-экономикалык негиздемесин жүргүзүү жөнүндө макулдашуу;

3. Кыргызстандын Суу ресурстары, айыл чарба жана кайра иштетүү өнөр жайы министрлиги менен Кытай Эл Республикасынын Башкы бажы башкармалыгынын ортосундагы экспорттолуучу кургатылган жемиштерге карата инспекциялык, карантиндик жана санитардык талаптар жөнүндө протокол;

4. Министрлер кабинетине караштуу Жарандык авиация мамлекеттик агенттигинин алдындагы "Кыргызаэронавигация" мамлекеттик ишканасынын Бишкек райондук диспетчердик борбору менен Кытайдын Жарандык авиация башкармалыгынын Синьцзян аба кыймылын уюштуруу бюросунун Үрүмчү райондук диспетчердик борборунун ортосундагы макулдашуу каты;

5. "Кытай–Кыргызстан–Өзбекстан" темир жол долбоорундагы Кыргызстандын үлүшүн каржылоо үчүн жеңилдетилген насыя берүү жөнүндө ниет кат;

6. Чүй облусу менен Ганьсу провинциясынын ортосунда боордоштук мамилелерди түзүү жөнүндө меморандум;

7. Министрлер Кабинетине караштуу Мамлекеттик кызмат жана жергиликтүү өз алдынча башкаруу иштери боюнча мамлекеттик агенттиги менен Кытай Эл Республикасынын Эл аралык кызматташтык жана өнүктүрүү боюнча мамлекеттик агенттигинин ортосундагы адам ресурстарын өнүктүрүү жаатында кызматташтыкты чыңдоо боюнча өз ара түшүнүшүү жөнүндө меморандум;

8. Кыргыз Республикасынын Улуттук телерадиокорпорациясы менен Кытай медиакорпорациясынын ортосунда гуманитардык алмашуу боюнча биргелешкен иш-чараларды өткөрүү боюнча ниеттер жөнүндө протокол;

9. Кыргыз Республикасынын Улуттук телерадиокорпорациясы менен Кытай Эл Республикасынын "Синьхуа" маалымат агенттигинин ортосундагы жаңылыктар жаатында кызматташуу боюнча өз ара түшүнүшүү жөнүндө меморандум;

10. Кыргыз Республикасынын Экономика жана коммерция министрлигине караштуу Стандартташтыруу жана метрология борбору (Кыргызстандарт) менен Кытай Эл Республикасынын Базарды көзөмөлдөө жана жөнгө салуу боюнча башкы мамлекеттик башкармалыгынын (SAMR) ортосундагы өз ара түшүнүшүү жөнүндө меморандум.