Нарындагы эки жолду бүтүрүү милдети мамлекеттик ишканага жүктөлдү

Нарын шаарындагы Ленин жана Шералиев көчөлөрүндө жүрүп жаткан курулуш иштерин "Кыргызавтожол-Түндүк" мамлекеттик ишканасы улантат. Бул тууралуу Транспорт жана коммуникациялар министрлиги билдирди.

Буга чейин аталган жолдор "Бета Групп" компаниясы тарабынан салынып жаткан. Бирок коомчулуктагы нааразычылыктардан улам компаниянын аткаруучу директору Мирлан Амантуров кармалганы маалымдалды. УКМК аны менен бирге транспорт жана коммуникациялар министринин биринчи орун басары Талантбек Солтобаев да камакка алынганын билдирди.

Нарын облустук милициясы Кылмыш-жаза кодексинин "Кызмат абалын кыянаттык менен пайдалануу" беренеси боюнча Кыргызавтожол-Түндүк" мамлекеттик ишканасынын башкы директору менен 1-Жол куруу башкармалыгынын директору да кармалганын жарыялады.