Ташиев Жалал-Абадда окуучуларга тарбиялык саат өттү (видео)

Бүгүн, 1-сентябрда УКМКнын төрагасы Камчыбек Ташиев Жалал-Абад шаарында Сатыбалды Давлетов атындагы №14 мектептин жаңы имаратынын ачылыш аземине катышты.

Анда ал 11-класстын окуучуларына тарбиялык саат өтүүгө да жетишти. Ташиев балдарды билим алууга үндөдү.

"Эмдиги жылы окууну бүткөндө негизги маселе - бул силердин турмушка болгон даярдыгыңар. Ал эмне менен аныкталат? Негизинен, биринчи билим, экинчи тарбия менен аныкталат. Билимдүү болбосоңор азыркы заманда дароо билинип, коомдо бөлүнүп каласыңар. Ошондуктан жакшы окуп, тил үйрөнгүлө. Азыр замандын талабы мурдагыдан башкача",- деди ал.

Ошондой эле атайын кызматтын башчысы балалыгын эске алды.

"Мен 11 балалуу үй-бүлөдө тарбияланган кедей-кембагалдын баласымын. Атамдын дыйкан болгонун өмүр бою айтып, аны менен сыймыктанып келем. Ата-энем бизди жакшы тарбиялап, окуткан",- деп белгиледи ал.