Зеленский Парижде Европа лидерлери менен жолугушат

Украина президенти Владимир Зеленский 4-сентябрда Парижде өтө турган европалык лидерлердин жолугушуусуна катышууну пландап жатат. Бул тууралуу чет элдик басылмалар жазышты.

Франция президенти Эммануэль Макрондон тышкары, жыйынга катышуучулардын арасында Германиянын канцлери Фридрих Мерц, Улуу Британиянын премьер-министри Кир Стармер, НАТОнун баш катчысы Марк Рютте жана Еврокомиссиянын төрайымы Урсула фон дер Ляйен да бар экени айтылууда.

Мунун алдында Financial Times басылмасы Евробиримдиктин лидерлери менен НАТОнун баш катчысы 4-сентябрда Парижде Украинадагы жаңжалды жөнгө салуу маселесин талкуулай турганын жазган. Жолугушуу Макрондун демилгеси менен жогорку деңгээлдеги сүйлөшүүлөрдү улантуу максатында уюштурулууда.

The Telegraph гезити жазгандай, АКШнын жогорку кызмат адамдары Евробиримдиктин лидерлерине нааразы болуп жатат. Анткени алар Зеленскийди тынчтык келишимине жетишүүдө реалдуу эмес талаптарга түртүп жатышканын билдиришкен.