Ооганстанда жашыруун сулуулук салондоруна каршы күрөш башталды

Ооганстанда жашыруун иштеп жаткан сулуулук салондорун жабуу тууралуу буйрук чыкты. Бул тууралуу The Guardian жазды.

Жашыруун салондорду башкарган аялдарга бир ай ичинде салондорду жабуу талап кылынды, болбосо алар кармалышы мүмкүн.

Маалым болгондой, Ооганстанда 2023-жылдын август айынан баштап расмий түрдө сулуулук салондору жабылган, бул 12 миңден ашык ишкананын ишин токтотууга жана 50 миңден ашык аял-косметологдордун жумушсуз калышына алып келген.

Катаал чараларга карабай, өлкөнүн ар кайсы жерлеринде жашыруун салондор иштеп келген, бирок азыр талибдер аларды толугу менен жоюуну көздөшүүдө.

Коомчулуктун лидерлери менен аксакалдарга мындай салондорду таап, ээлери жөнүндө маалымат берүүгө тапшырма берилди.

The Guardian жазгандай, 38 жаштагы Фреста аттуу аял үч баласы менен салонун жашыруун иштетип келген.

"Талибдер сулуулук салондорубузду жаап салганда, мен үй-бүлөдө акча тапкан жалгыз адам элем, күйөөм ооруп калган, үч балабыз бар. Бардык чыгымдар мага жүктөлгөн", — дейт ал.

"Азыр мен уланта албайм деп ойлойм, себеби тобокелдик өтө чоң, бирок башка жумушту билбейм. Биздин абал өтө оор, бул дүйнөдө биздин үнүбүздү уккан же колдогон адам жок", — деген Фреста.

Эске салсак, Ооганстанда аялдарга күйөөсү же коштоп жүргөн эркек тууганы жок сейил бактарга барууга, билим алууга, спорт менен машыгууга жана телесериалдарга тартылууга тыюу салынган.