Трамп "Нобель" сыйлыгын алууну каалабай турганын билдирди

АКШ президенти Дональд Трамп "Нобелдин" тынчтык сыйлыгына ээ болууну каалабай турганын билдирди. Бул тууралуу ал The Daily Caller басылмасына берген маегинде айтты.

Трамп өз сөзүндө ага карата адилет мамиле болушу керек экенин белгиледи.

"Бул суроого жооп берүү кыйын болмок, анткени ал коркунучтуу угулат эле. Мисалы, эгер мен “ооба, мен каалайм” десем... Мен антип айта албайм. Андай абалга өзүңдү алып келүү мүмкүн эмес. Бирок тарыхта менин кылгандарымды кылган эч ким болгон эмес",- деди Трамп.

Анын айтымында, ал жети согуштун алдын алган, анын ичинде Индия менен Пакистандын ортосундагы согушту да токтоткон.

АКШ президентинин "Нобель" тынчтык сыйлыгына ээ болуу каалоосун дүйнөнүн көптөгөн лидерлери колдошкон, алардын катарында Беларусь президенти Александр Лукашенко да бар. Ал 22-августта билдирүү жасап, Трамп бул сыйлыкка чын эле татыктуу экенин айткан. Ошондой эле Лукашенко Трампты мурдагы АКШ президенти Барак Обама менен салыштырган. Анын пикиринде, Обама эч нерсе кылган эмес, тескерисинче, бир нече согушту баштаган.

Муну менен катар, The Economist басылмасы Европа Трамптын "Нобель" сыйлыгына умтулуусун колдонуп, аны Украинадагы согушту токтотууга түртүп жатканын жазган.

Эске салсак, Трамптын аталган сыйлыкты алуусун колдогондордун катарында Азербайжандын президенти Илхам Алиев, Армениянын премьер-министри Никол Пашинян, Камбоджанын премьер-министри Хун Сен, Габондун президенти Брайс Олиги Нгема, Израилдин премьер-министри Биньямин Нетаньяху, Пакистандын өкмөтү жана Руанадан тышкы иштер министри Оливье Ндухунгирехе бар.