Францияда Сириянын мурунку президенти Башар Асадды камакка алуу буйругу чыкты

Франциядагы сот Сириянын мурунку президенти Башар Асадды камакка алуу буйругун чыгарды. Бул тууралуу France 24 басылмасы жазды.

Бул буйрук америкалык журналист Мари Колвин менен француз фотографы Реми Оклинин өлүмү боюнча иштин алкагында берилди. Алар 2012-жылы Хомс шаарын өкмөттүк аскерлер тарабынан бомбалоонун натыйжасында каза болушкан.

Мурунку президенттен тышкары, анын администрациясынын мурунку алты жогорку кызматкерлерин камакка алуу буйругу берилди.

2023-жылдын ноябрь айында Франциядагы сот Башар Асадга Сирияда 2013-жылы уюштурулган химиялык кол салуулар боюнча айыптоо менен камакка алуу буйругун чыгарып келген. Бирок 2025-жылдын июль айында Франциянын жогорку кассациялык соту бул буйрукту жокко чыгарып, Асад ошол кылмыштар жасалган учурда президент болуп турганын белгилеген.

Асад Сирияны 20 жылдан ашык башкарган. 2024-жылдын декабрында анын режими кулатылып, өзү болсо Орусияга качып кеткен. Кремл расмий түрдө анын "гуманитардык максатта" саясий башпаанек алганын тастыктаган.