Германия канцлери Орусияга экономикалык кысым көрсөтүүгө чакырды

Германиянын канцлери Фридрих Мерц Украинадагы конфликтти чечүү үчүн Орусияны экономикалык жактан кысымга алуу керектигин айтты. Бул тууралуу чет элдик басылмалар жазышты.

Мерц Владимир Путинди куралдуу кармашты токтотууга каалоосу жок деп айыптап, Орусия президентине ишенүүгө "эч кандай негиз жок" экенин кошумчалады.

Канцлер конфликтти чечүүгө негиз түзүү керектигин, ал үчүн экономикалык кысым пайдалуу деп эсептей турганын белгиледи.

"Биз ага көмөктөшүүбүз керек, анткени бул Москвага өзүнүн аскердик экономикасын каржылоого мүмкүнчүлүк бербей калат",- деп түшүндүрдү Мерц.

Эскерте кетсек, Орусия лидеринин басма сөз катчысы Дмитрий Песков өлкө экономикасы көп сандагы чектөөлөргө карабай иштеп жатканын белгилеген. Ошондой эле, ал Москва конфликтти чечүү боюнча диалогго даяр экенин, бирок Киев бул диалогдон баш тартып жатканын кошумчалаган.