"Элди суукка калтырбайлы". Жанар Акаев Увам каналынын жээгин бошотууну токтото турууну сунуштады

Бүгүн, 3-сентябрдагы Жогорку Кеңештин жыйынында депутат Жанар Акаев Оштогу Увам каналынын жээгин бошотууну суук түшкөнүнө байланыштуу токтото туруу керек экенин айтты.

Ал Ош шаарынын мэри Жеңишбек Токторбаевдин демилгесин колдоорун, бирок суук түшкөнүнө байланыштуу үйү бузулган жарандарда көйгөй жаралышы мүмкүн экенин эскертти.

"Мына, Датка айыл өкмөтүнүн тургундарына Айыл чарба министрлигинен 10 күндүн ичинде тазалоо эскертүүсү түшүптүр. Аткаруу бийлигине кайрылам, ошол каналды тазалоо иштерин азырынча токтотуп турсаңар. Алар суук түшкөндө үйлөрүн бузуп, аны көчүрүп үлгүрбөйт. Эл менен компенсация тууралуу келишимдерди түзүп, аларга кандай жардам берилери чечилгенден кийин гана каналдын жээгин бошотуу иштерин баштоо керек. Элди суукка калтырбайлы",- деди ал.