Көлбаев, Анапияев менен байланышы болгон делип "Кеша" каймана аттуу киши кармалды (видео)

"Кеша" каймана аттуу уюшкан кылмыштуу топтун мүчөсү кармалды. Бул тууралуу Улуттук коопсуздук мамлекеттик комитети билдирди.

Атайын кызмат ал убагында Камчы Көлбаевдин тарапташы, Анапияевдин кылмыштуу тобунун мүчөсү болгонун белгиледи. Ал 2009-жылдан бери уюшкан кылмыштуу топтун мүчөсү катары каттоодо турган.

Шектүү 2016-жылы тыюу салынган баңгизаттарын саткандыгы үчүн 12 жылга абакка кесилген. Жазасынын жарымын өтөгөндөн кийин шарттуу түрдө мөөнөтүнөн мурда бошотулган. 2022-жылдын 18-октябрынан 2025-жылдын 13-мартына чейин пробациялык көзөмөлдө болгон.

Пробациялык көзөмөлдө жүргөн мезгилде, тагыраагы, былтыр декабрь айында ал көзөмөл шарттарын одоно бузуп, кыргыз-казак чек арасын системдүү түрдө мыйзамсыз кесип өтүп жүргөн.

УКМК ал тыюу салынган заттарды ташып кирүү жана мамлекеттик чек араны мыйзамсыз кесип өтүүгө шектелип кармалганын жана убактылуу кармоочу жайга киргизилгенин кошумчалады. Учурда кылмыштын бардык жагдайлары жана кылмышка тиешеси бар башка адамдарды аныктоо иштери жүрүүдө.