Өзбекстанда эми абакта отургандар жаза мөөнөтүн китеп окуп кыскарта алышат

Өзбекстандын Сенаты атайын мыйзам кабыл алды. Эми соттолгондор ар бир окуган китеби үчүн абактагы мөөнөтүн 3 күнгө кыскарта алышат. Бул тууралуу республикалык мыйзам чыгаруу органына шилтеме берип чет элдик басылмалар жазышууда.

"Комиссиянын жыйынтыгына ылайык, ар бир окулган китеп үчүн жаза мөөнөтү 3 күнгө кыскартылышы мүмкүн. Бирок бир жыл ичинде 30 күндөн ашпоого тийиш. Окула турган китептер Республикалык руханий жана агартуу борбору тарабынан бекитилген атайын тизмеде болот. Бул китептер моралдык жана тарбиялык баалуулуктарды калыптандырууга багытталган. Китеп чындап окулганын атайын комиссия тастыкташы керек. Бул мүмкүнчүлүк шарттуу түрдө мөөнөтүнөн мурда бошотулушу мүмкүн болгон адамдарга гана тиешелүү. Өмүр бою эркинен ажыратылгандар бул укуктан пайдалана алышпайт",- деп белгиленди маалыматта.

Өзбекстанда бул мыйзам болжол менен 13 500 соттолгон адамга тийиштүү болот деп күтүлүүдө.