Румыния Украинага аскер жөнөтүүдөн баш тартты

Румыния президенти Никушор Дан Antena1 телеканалына берген маегинде Румыния Украинанын аймагына аскер жөнөтпөө чечимин кабыл алганын айтты.

"Орусияга жакын жайгашкан көптөгөн өлкөлөр биз менен бирдей чечим кабыл алышты. Мүмкүн болгон тынчтык же ок атышууну токтотуу учурларында Украинага аскер жөнөтпөйбүз",- деди ал.

Ошол эле учурда Дания өлкөсү тынчтыкты камсыздоодо логистикалык жардам көрсөтүү жана өзүнүн базаларын колдонуу аркылуу катышууга ниеттенерин белгиледи. Бирок муну ишке ашыруу үчүн ок атышууну токтотуу зарыл экенин кошумчалады.

Эске салсак, кечээ, 4-сентябрда "Каалоочулар коалициясы" жыйынынан кийин Франция президенти Эммануэль Макрон 26 өлкө ок атышууну токтоткондон кийин Украинада өз аскерлерин жайгаштырууга макул болгонун жарыялады. Ал эми Европа Комиссиясынын төрайымы Урсула фон дер Ляйен бул өлкөлөр Украина үчүн коопсуздук кепилдигин камсыздоодо өздөрүнүн аскердик күчтөрүн пайдаланууга даяр экенин белгиледи.