Непалда социалдык тармактарды тыюуга каршы нааразылык болуп, 19 адам каза тапты

Непалда социалдык тармактарды тыюу жана бийликтин коррупциясына каршы чыккан демонстранттар менен өкмөттүк коопсуздук күчтөрүнүн кагылышуусунда кеминде 19 адам каза болуп, ондогон адамдар жаракат алды.

Дүйшөмбү күнү миңдеген адамдар Катманду шаарындагы парламент имаратына чогулуп, Facebook, X жана YouTube сыяктуу платформаларды тыюу боюнча бийликтин чечимине жана жалпы өкмөттүк саясатка нааразылыгын билдиришти.

Непалдын байланыш министри Притхви Субба полиция суу чачуучу машинелерди жана резина окторду колдонууга мажбур болгонун айтты. Өкмөт социалдык тармактарды чектөө чечимин интернетти фейк маалыматтарга жана онлайн алдамчылыкка каршы жөнгө салуу зарылдыгы менен түшүндүрүүдө.

Өткөн аптада бийлик 26 социалдык платформаны Непалдын Байланыш жана маалымат технологиялары министрлигинде мөөнөттө катталбагандыгы үчүн блокко алган.

Интернетке жана социалдык тармактарга эркин кирүү Непалдын туристтик тармагына өтө маанилүү, ал өлкөнүн кирешесинин чоң бөлүгүн түзөт. Өткөн жылы альпинисттердин тоого чыгышы үчүн алынган төлөмдөр Непал үчүн 5,9 миллион доллар киреше алып келген.

Өкмөт социалдык тармактарды тыюу эмес, аларды өлкөнүн мыйзамдарына ылайык келтирүүгө аракет кылып жатканын айтууда. Непалда социалдык тармактарды миллиондогон адамдар колдонот, эң популярдуу платформа — Instagram. Колдонуучулардын айтымында, социалдык тармактар аларга жөн гана көңүл ачуу же жаңылыктарды окуу эмес, бизнес жүргүзүү үчүн да керек.