"Миңдеп курулуш керек болчу". Президент Нарында ипотекалык үйлөрдүн санын көбөйтүүнү тапшырды

Кечээ, 8-сентябрда өлкө башчы Садыр Жапаров Нарын шаарына болгон иш сапарында Мамлекеттик ипотекалык компания тарабынан салынып жаткан көп кабаттуу батирлердин курулуш иштери менен таанышты.

Президент Нарын шаарында курулуп жаткан ипотекалык үйлөрдүн саны аз экенин белгилеп, көбөйтүүнү тапшырды.

"Нарын менен Таласта аябай аз болуп жатат. Миңдеп курулуш керек болчу",- деди Жапаров.

Президенттин иш башкаруучусу Каныбек Туманбаев МИКке батир куруу үчүн 8 гектар жер бөлүнүп жатканын айтты. Ал ошондой эле учурда салынып жаткан батирлердин курулушу бетон маселесинен улам жай жүрүп келгенин, ал маселе эми чечилгенин белгиледи. Туманбаев быйыл жыл аягына чейин 216 батир тапшырыларын билдирди.