Каир музейинен жоголгон фараондун алтын билериги эритилип, башка буюмга айланган

Египеттин Каир шаарындагы музейден жоголгон фараондун алтын билериги сатылып, андан кийин эритилип башка буюмга айланган. Бул тууралуу египеттик басылмалар жазышты.

Ички иштер министрлигинин маалыматына караганда, билерикти музейдин реставрация кызматкери уурдап, андан соң Каирдеги күмүш соодагерине саткан. Соодагер билерикти 180 миң египет фунтуна (3750 доллар) алтын устаканасынын ээсине өткөрүп берген. Ал эми устакананын ээси билерикти 194 миң фунтка (4000 доллар) алтын куюучу жайдын жумушчуcуна сатып, жумушчу аны башка зер буюмдар менен кошо эритип, жаңы буюмга айландырган.

Шектүүлөр кармалып, күнөөлөрүн моюнуна алышты. Уурдалган билериктин сатылышынан түшкөн каражат кайтарылган.

Эске салсак, буга чейин Египет музейинин реставрация бөлүмүндөгү темир сейфтен Байыркы Египет дооруна таандык алтын билерик жоголгону маалымдалган.