Түптө Токтоян–Сары-Тологой унаа жолу асфальтталды

Түп районунда бир нече унаа жолдорду асфальттоо иштери ийгиликтүү жыйынтыкталды. Бул тууралуу Транспорт жана коммуникациялар министрлигинин маалымат кызматынан билдирди.

Михайловка–Николаевка–Токтоян–Сары-Тологой унаа жолунун 7 чакырым аралыгына (19–26-чакырым) асфальт төшөлүп, пайдаланууга берилди. Өткөн жылы бул жолдун 6,6 чакырым асфальтталган. Ошондой эле Каркыра–Турук–Сары-Жаз жолунун 13–16-чакырым аралыгына асфальт басуу иштери бүткөрүлдү.

Мындан тышкары Долон–Кош-Дөбө унаа жолундагы көпүрөнүн курулушу уланууда. Учурда кɵпүрɵнүн тирɵɵчтɵрүн орнотууга жээктери бекемделүүдө.

Жол иштери №4 Жол тейлөө ишканасы тарабынан жүргүзүлдү. Азыркы тапта шагыл жолдорду жана жайлоого кеткен жолдорду убактылуу кароо, жаандан кийинки сүрүп-тегиздөө иштери жүрүүдө.