"Шоро" компаниясынын негиздөөчүсүнө "Эмгек баатыры" наамын берүү сунушталды

Жогорку Кеңештин депутаты Мирлан Самыйкожо парламенттин 24-сентябрдагы жыйынында "Шоро" компаниясынын жана "Супара" этнокомплексинин негиздөөчүсү Табылды Эгембердиевге "Эмгек баатыры" наамын берүүнү сунуштады.

Депутаттын айтымында, анын дарегине бул сунуш боюнча кыргыз интеллигенциясынан кайрылуу түшкөн.

"Бүгүнкү күндө Табылды Эгембердиевдей инсандарыбыз өтө сейрек. Бул инсанды "Эмгек баатыры" сыйлыгына көрсөткөнүбүз эң туура болот деп ойлойм",- деди Самыйкожо.

Ошондой эле эл өкүлү Кыргыз Республикасынын Эл акыны Шайлообек Дүйшеевге да "Эмгек баатыры" наамын берүүнү сунуштады.

Маалымат үчүн: Табылды Эгембердиев 1951-жылы Нарын облусуна караштуу Жумгал районундагы Жумгал айылында туулган. 1992-жылы "Шоро" жабык акционердик коомун негиздеген жана алкоголсуз ичимдиктерди өндүрүү ишин жайылткан. 2011-жылы Бишкектин чет жагында "Супара" этнографиялык комплексин түзгөн. 2011-жылдан тартып Ордо федерациясынын президенти болуп иштеген. Базар экономикасынын шарттарындагы жемиштүү эмгеги үчүн "Даңк" медалына ээ болгон.

Эгембердиев 2015-жылы 16-майда узакка созулган оорудан кийин каза болгон.