Бишкекте "Биздин класс" сериалы жабык түрдө көрсөтүлдү

Бишкек шаарындагы “Ала-Тоо” кинотеатрында “Биздин класс” сериалы тар чөйрөгө жабык түрдө көрсөтүлдү.

Агартуу министрлигинен билдиришкендей, иш-чарага агартуу министри Догдуркүл Кендирбаева катышып, сериал тууралуу өз пикирин билдирди.

“Тасмада эң негизгиси күнүмдүк мектеп турмушу менен бирге ар бир баланын лидерлик сапатын ачып, ишеним арткан педагогдун чоң ролу чагылдырылган экен. Бул ишеним деп аталат. Эгерде мугалимге бала ишенсе, ал бардык нерсеге жетише алат”,- деди Кендирбаева.

Чыгармачыл топтун айтымында, “Биздин класс” сериалы “Кыргызсериал” чыгармачылык-өндүрүштүк бирикмесинин башкы продюсери Жеңишгүл Өзүбекованын идеясы боюнча тартылган.

Сериалдын негизги максаты - мектеп жашоосун чагылдыруу аркылуу окуучуларга достукту бекем сактоону, бири-бирине жардам берүүнү жана мугалимдерди сыйлоону үйрөтүү. Ошондой эле мектеп мезгилин өзгөчө учур катары баалоого үндөө менен мугалимдердин эмгегинин ары жоопкерчиликтүү, ары түйшүктүү экенин көрсөтүп, мугалимдерди барктоого чакыруу экени айтылды.