Айыл өкмөт башчыларын тандоо тартибине өзгөртүү киргизилди

Жогорку Кеңеш бүгүн, 25-сентябрдагы жыйынында айыл өкмөт башчыларын тандоо тартибине өзгөртүү киргизүү тууралуу мыйзам долбоорун 3 окууда карап, жактырды.

Жыйында документ менен мамлекеттик кызмат жана жергиликтүү өз алдынча башкаруу иштери боюнча мамлекеттик агенттиктин директору Кудайберген Базарбаев тааныштырды.

Анын айтымында, мыйзам долбоору айыл өкмөт башчыларынын ишинин натыйжалуулугун жогорулатуу максатында иштелип чыккан.

Белгилей кетсек, “Жергиликтүү мамлекеттик администрация жана жергиликтүү өз алдынча башкаруу органдары жөнүндө” мыйзамдын 52-беренесинин 3-бөлүгүнүн 3-пунктуна ылайык, тиешелүү айыл аймагында туулган адам айыл өкмөтүнүн башчысы болуп дайындала албайт болчу.

Ал эми сунушталган мыйзам долбоорунда аталган берененин 3-пунктун жокко чыгаруу сунушталган. Тактап айтканда, эми тиешелүү айыл аймагында туулган адам айыл өкмөтүнүн башчысы болуп дайындала алат.