Төрага: "Депутаттар жаңы парламент шайлангыча ыйгарым укуктарын сактап турушат"

Жогорку Кеңештин төрагасы Нурланбек Тургунбек уулу VII чакырылыштын депутаттарынын ыйгарым укуктары жаңы парламент шайланып келгенче сактала турганын айтты. Мындай пикирин төрага бүгүн, 25-сентябрдагы парламенттин жыйынында билдирди.

Айтымында, парламенттин VIII чакырылыштагы депутаттары Жогорку Кеңеште ант бергенге чейин депутаттардын ыйгарым укуктары сакталат.

"Мыйзамга ылайык, эгерде өзгөчө кырдаал болсо, Жогорку Кеңештин төрагасы катары кезексиз сессия чакырууга ыйгарым укуктарым бар. Биз аракеттеги парламент болуп кала беребиз",- деди төрага.

Белгилей кетсек, бүгүн парламент жыйынында Жогорку Кеңештин өзүн-өзү таратуусу боюнча чечим кабыл алынды. Аталган сунушту 32 депутат демилгелеген.

Жыйында баяндама жасаган депутат Улан Примов депутаттарды таркатууга шайлоо боюнча жаңы мыйзам кабыл алынганын жана президенттик жана парламенттик шайлоолордун удаа болушу негиз болгонун билдирди.