Мамлекеттик катчы "Улуттук дем – дүйнөлүк бийиктик" уңгужолуна арналган иш-чарага катышты

Мамлекеттик катчы Марат Иманкулов Жогорку Сотто өткөн "Улуттук дем – дүйнөлүк бийиктик" уңгужолуна арналган иш-чарага катышты. Бул тууралуу президенттин маалымат кызматы кабарлады.

Маалыматка ылайык, иш-чара "Улуттук дем – дүйнөлүк бийиктик" уңгужолунун коомдук-саясий, укуктук жана руханий багыттарын сот системасына терең сиңирүү максатын көздөдү.

Мамлекеттик катчы өз сөзүндө уңгужол – бул улуттук идеологиянын негизги документи экенин баса белгиледи. Анын максаты – адептүү, мекенчил жарандарды тарбиялоо, мамлекеттик институттарды бир багытта өнүктүрүү жана коомдун руханий коопсуздугун камсыз кылуу экенин белгиледи.

Сот системасынын ролуна токтолгон Марат Иманкулов адилеттүүлүк жана мыйзам үстөмдүгү уңгужолдун негизги таянычтары экенин айтып, ар бир сот кызматкерин мыйзамдуулукка жана акыйкаттыкка бекем турууга чакырды.

"Адилет сот – кубаттуу мамлекеттин тиреги. Ар бир кызматкер элдин үмүтүн актай турган ишенимдүү өкүл болушу керек", – деди мамлекеттик катчы.