Бишкекте милиция кызматкерлерин сөккөн айдоочу камалды (видео)

Бишкекте милиция кызматкерлерине баш ийбеген делип 30 жаштагы киши кармалды. Бул тууралуу Ленин райондук ички иштер бөлүмү билдирди.

Маалыматка ылайык, кечээ, 27-сентябрда саат 12:00 чамасында милиция кызматкерлери унаасын каршы тилкеге ​​токтотуп койгон айдоочудан айдоочулук күбөлүгүн сурашкан. Бул учурда ал тартип сакчылары менен урушуп, агрессиясын көрсөтүп, алардын дарегине уят сөздөрдү айткан.

Факт каттоого алынып, тергөөгө чейинки иликтөө иштери башталган. Ага карата Укук бузуулар кодексинин 126-беренеси (Майда бейбаштык) менен административдик протокол түзүлүп, Ленин райондук сотунун чечими менен үч суткага камакка алынган.

Райондук милиция ошондой эле айдоочуга Укук бузуулар кодексинин 188-беренеси (Транспорт каражаттарынын айдоочуларынын жол кыймылынын эрежелерин бузуу) боюнча да протокол түзүлүп, унаасы айып короого киргизилгенин кошумчалады.