Эрдоган: "Түркия чыр-чатакка дуушар болгон коңшуларына далысын салбайт"

Түркиянын президенти Режеп Тайып Эрдоган Анкара чыр-чатакты башынан кечирип жаткан коңшуларына далысын салбастыгын жана Сирия, Украина жана Газада тынчтык орнотуу үчүн аракет кылып жатканын билдирди.

"14 жыл бою эзилген сириялыктарды бардык ресурстарыбыз менен колдодук. Көптөгөн өлкөлөр Сирия элинен жүз бурганда, биз аларды эч качан таштаган жокпуз. Орус-украин кагылышуусу учурунда да ушундай кылганбыз. Башкалар отко май чачып жатканда, биз адилеттүү тынчтык үчүн аракет кылып жаттык. Азыр Палестина менен Газа тилкесинде да ушундай иштерди жасап жатабыз", - деп келтирет чет элдик басылмалар анын Стамбулда сүйлөгөн сөздөрүн.

Израилдин премьер-министри Биньямин Нетаньяхунун Газадагы саясаттарына токтолгон Эрдоган: "Нетаньяху жана анын өлтүрүүчү күчтөрү палестиналык жарандарга эң заманбап куралдар менен кол салууда, бейкүнөө адамдардын үстүнө бомба таштоодо. Газада кары-картаңдарды жана балдарды мыкаачылык менен өлтүрүп жатышат. Газада ачарчылык массалык кыргын салуучу курал катары колдонулууда. Адам өмүрүн сактап калууга аракет кылган медицина кызматкерлери бүткүл дүйнөнүн көз алдында өлтүрүлүүдө".