Орбан Зеленскийден Венгрияга болгон куугунтукту токтотууну өтүндү 

Венгриянын премьер-министри Виктор Орбан Украинанын президенти Владимир Зеленскийди Венгрияны куугунтуктоону токтотууга чакырды.

"Венгрия – НАТОнун жана Евробиримдиктин мүчөсү. Бул эки уюмдун колдоосу болбосо Украина эбак жеңилип калмак. Президент Зеленский, урматтоо менен бизге куугунтукту токтот!" - деп жазды ал социалдык тармактагы баракчасына.

Эске салсак, жума күнү Зеленский чалгындоо учкучсуз учактары Венгрия менен чек арага жакын жерде Украинанын аба мейкиндигин бузганын билдирген. Украин президенти пилотсуз учактар ​​Венгерияныкы болушу мүмкүн деп божомолдогон.

Украина батышта Венгрия менен чектешет. Май айында Украинанын Коопсуздук кызматы Закарпатия аймагында венгриялык чалгын тармагынын бетин ачканын билдирген.

Киев менен Будапешттин мамилеси Венгриянын Украинанын Евробиримдикке кирүүсүн колдоодон баш тартуусунан жана Украинанын куралдуу күчтөрүнүн Орусиядан Венгрияга күйүүчү май ташыган Дружба мунай кууруна кол салууларынан улам начарлап кеткен.