Камерунда президенттик шайлоо кампаниясы башталды

Камерунда президенттик шайлоо алдындагы үгүт өнөктүгү бүгүн, 29-сентябрда расмий башталды. Бул тууралуу чет элдик басылмалар жазышууда.

Мамлекет башчысынын кызматына жалпы 12 талапкер ат салышууда, алардын ичинде бир аял талапкер да бар. Шайлоо өнөктүгү 12-октябрга чейин уланмакчы - дал ошол күнү өлкөдө президенттик шайлоо өтөт.

Азыркы президент Пол Бия дагы жети жылдык мөөнөткө шайлануу максатында катышууда. Ал бийликте 1982-жылдан бери, 43 жылдан бери турат жана Камерун Элдик-Демократиялык Кыймылынын лидери катары талапкерлигин койгон.

Анын негизги атаандашы – Социал-демократиялык фронт партиясынан чыккан Жошуа Осих экени айтылууда. Эксперттер бул шайлоо өлкөнүн келечеги үчүн маанилүү саясий бурулуш болушу мүмкүн деп баалашууда.

Шайлоого карата өлкөдө коопсуздук чаралары күчөтүлүп, эл аралык байкоочулар да чакырылган.