Президент мамлекеттик кызматкерлер шайлоого кандай шартта талапкер боло алышарын айтты

Президент Садыр Жапаров мамлекеттик кызматкерлер Жогорку Кеңештин депутаттарын мөөнөтүнөн мурда шайлоого кандай шартта талапкер боло аларын айтты. Бул тууралуу пикирин президент "Кабар" агенттигине маек бергенде билдирди.

Мамлекет башчысы билдиргендей, мамлекеттик кызматкерлерге алдыдагы шайлоого катышуу үчүн эч кандай чектөө коюлбайт.

"Парламенттин депутаты болот элем, талапкер болот элем десе, аларга эч кандай чектөө жок. Кызматтарын тапшырып коюп, шайлоолорго катыша беришсин. Министрби, мэрби, акимби же мектеп директору же жөнөкөй мугалим болобу талапкерлигимди коём десе, ээлеген кызматтарын тапшырып беришсин дагы, катыша берсин. Жетиштүү добуш алып өтүп кетсе депутат болуп калышат. Өтпөй калса, талапкер болгонго чейин ээлеген кызматтарынан дагы кол жуушат.

Антпесек жетекчилик кызматтагылар кол астындагыларды “мен өтпөй калсам, ордума кайра келем. Мага чуркабасаңар, көрсөтөм силерге!” деп коркутушу мүмкүн",- деди президент.