Казакстанда окуучуларга кол көтөргөн мугалим бир жылдан кийин иштен алынды(видео)

Казакстанда окуучуларга кол көтөргөн мугалим окуядан бир жыл өткөндөн кийин кызматтан алынды. Бул тууралуу казак басылмалары жазышууда.

Социалдык тармактарда Алматыдагы мектептердин биринде тартылган видео тараган. Видеодо мугалим окуучуларды урганы көрүнөт.

Окуя жүрүп жаткан учурда балдар коркуп, мугалимден качып жатышканы байкалат. Окуучулар мугалимге мындай мамиле кылууга укугу жок экенин да айтышкан.

Алматы облусунун билим берүү башкармалыгы билдиргендей, окуя 2024-жылдын сентябрында Карасай районунда болгон, видеодогу тогузунчу класстын окуучулары болушкан.

"Текшерүү жүргүзүлдү. Анын жыйынтыгына ылайык, Карасай райондук билим берүү бөлүмү математика мугалимин кызматтан кетирүү чечимин кабыл алды", — деп айтылат билим берүү башкармалыгынын билдирүүсүндө.