Америкалык рэпер Пи Дидди төрт жыл эки айга эркинен ажыратылды

Нью-Йорктогу сот рэпер Шон Комбсту сойкулукка тартуу максатында адамдарды ташыган деген айып менен 50 айга (4 жыл 2 айга) камакка алуу тууралуу өкүм чыгарды. Сот ошондой эле мыйзам боюнча максималдуу 500 миң доллар айып пул салды.

Комбс мурдагы сүйүктүүсү, ырчы Кэсси Вентура жана дагы бир кызга карата рэкет жана сексуалдык эксплуатация максатындагы күч колдонуу боюнча айыптардан акталды.

Рэпердин 2024-жылдын сентябрь айынан бери камакта отурган убактысы эсепке алынса, үч жылдан азыраак мөөнөттө бошотулушу мүмкүн.

Комбс өз күнөөсүн мойнуна алган жок жана адвокаты Марк Агнифило билдиргендей, аппеляцияга арыз берүүнү пландап жатат.

Эске салсак, буга чейин Нью-Йорк федералдык прокурорлору Пи Диддини 11 жылга абакка кесүүнү талап кылышкан.