Кытай асманындагы шоу: Дрондор көрүүчүлөрдүн үстүнө кулап, өрт чыкты

1-октябрда Кытай Эл Республикасынын түзүлгөнүнүн 76 жылдыгына карата Люян шаарында уюштурулган дрон шоу кырсык менен аяктады. Бул тууралуу чет элдик басылмалар жазышты.

Шоунун жүрүшүндө ири техникалык мүчүлүштүк болуп, жүздөгөн дрондор башкаруудан чыгып, көрүүчүлөрдүн үстүнө, үйлөрдүн чатырларына жана көчөлөргө кулаган. Натыйжада өрт чыккан.

Иш-чараны уюштургандардын айтымында, бул шоуго рекорддук сандагы дрондор катышкан. Окуя тартылган видеолордо дрондор кулап түшүп, жалынга оронуп жатканы көрүнөт. Бул кадрлар Кытай жана эл аралык социалдык тармактарда тарап жатат.

Кырсык чоң болгон менен, адам өмүрү кыйылган эмес. Бирок жергиликтүү бийлик окуянын себептерин иликтөө жана келтирилген зыянды аныктоо боюнча текшерүү иштерин баштаганын билдирди.