Өлкөдө абактагылар бариста кесиби боюнча окутулууда (видео)

Кыргызстанда абактагыларга бариста кесиби үйрөтүлүүдө. Бул тууралуу Жазаларды аткаруу мамлекеттик мекемесинен билдиришти.

Маалым болгондой, 2-октябрда Министрлер кабинетине караштуу Жазаларды аткаруу мамлекеттик кызматынын (ГСИН) №8 мекемесинде бариста кесиби боюнча заманбап окуу классынын ачылышы болуп өттү.

Мекеме бул класстын ачылышы соттолгондорду кесиптик окутуу тутумун өнүктүрүүдөгү жана алардын коомго ийгиликтүү кайра кайтып келүүсүнө шарт түзүүдөгү маанилүү кадам болуп санала турганын айтты.

Бариста кесиби боюнча окутуу Жазык-аткаруу кодексинин, "Билим берүү жөнүндө" жана "Баштапкы кесиптик билим берүү жөнүндө" мыйзамдарынын алкагында, ошондой эле 2003-жылдын 25-апрелиндеги №245 Өкмөттүн токтомуна ылайык жүргүзүлүүдө.

Иш-чарага республикалык илимий-усулдук борборунун директорунун орун басары Алымкан Саттарова катышып, мындай демилгелер соттолгондордун билим деңгээлин жогорулатууда жана эркиндикке чыккандан кийинки мүмкүнчүлүктөрүн кеңейтүүдө чоң роль ойноорун белгиледи.

Бүгүнкү күндө Жазаларды аткаруу мамлекеттик мекемесинин тутумунда соттолгондор мамлекеттик үлгүдөгү сертификат берилүүчү 23 багыт боюнча билим алуу мүмкүнчүлүгүнө ээ. Мекемеден билдиришкендей, бул алардын социалдашуусуна жана эркиндикке чыккандан кийин жумушка орношуу мүмкүнчүлүгүнө өбөлгө түзөт.