"Коркуп кеттим". Ошто такси айдоочусу кардардын буюмдарын ыргытып жиберди (видео)

Ошто такси айдоочусу менен кардардын ортосунда пикир келишпестик жаралып, айдоочу кардардын буюмдарын ыргытып жиберген. Бул тууралуу кардар социалдык тармакта жарыялаган.

Маалым болгондой, окуя кечээ, 4-октябрда болгон.

"Мен комфорт-класстагы такси чакыргам. Колумда товар салынган пакеттерим бар болчу, аларды арткы отургучка койдум. Айдоочу дароо эле эмне үчүн андай кылганыма нааразы болуп, уруша баштады",- деди кардар.

Андан соң ал буюмдарын машинанын артына (багажникке) салып коюу үчүн аны ачып берүүсүн суранган. Бирок ал жүрүүдөн баш тартып, сөгүнүп, урушуп кирген.

"Мен дагы бир жолу кечирим сурадым, анткени жумушка кечигип жаткам. Бирок айдоочу кыйкырып, мени кемсинтип, орой сүйлөп жатты.

Мындай мамиледен кийин мен видео тартууну чечтим. Ошондо ал менин бардык буюмдарымды тагыраагы, сумкамды, товарларымды, кийимдеримди сыртка ыргытып жиберди да, машинасы менен сүзүп ала жаздады", - деп билдирди кардар.

Кардар мурда да чоң кутуларды таксиде ташыган учурлары болгонун, бирок эч качан маселе чыкпаганын айтты.

"Мен мүмкүн болушунча сабырдуу болууга аракет кылдым, бирок ошол учурда чын эле коркуп кеттим. Ал мага зыян тийгизип коюшу мүмкүн деп ойлодум", - деди кардар.