Физиология жана медицина боюнча Нобель сыйлыгынын лауреаттары жарыяланды

Стокгольмдо физиология жана медицина боюнча Нобель сыйлыгынын лауреаттары жарыяланды. Мэри Бранков, Фред Рамсделл жана Шимон Сакагучи "перифериялык иммунологиялык толеранттуулукту изилдегени үчүн" Нобель сыйлыгына татыктуу болушту.

"Бул жерде "толеранттуулук" деп иммундук системанын зыянсыз стимулдарга, мисалы, организмдин өзүнүн клеткаларына каршы реакция кылбоо жөндөмдүүлүгү айтылууда. Толеранттуулук негизинен адамдын эрте өнүгүү баскычтарында, Т-клеткалар жетиле турган тимус деген атайын органдa калыптанат. Бирок азыркы лауреаттар иммундук жөнгө салуу муну менен эле чектелбестигин көрсөтүштү. Иммундук толеранттуулукка байланыштуу маанилүү процесстер тимустан тышкары, чоңойгондон кийин да уланат. Бул ачылыш аутоиммундук жана онкологиялык оорулардын келип чыгышын түшүнүүдө чоң мааниге ээ", - деп кошумчаланды маалыматта.

Нобель аптасынын графиги:

• 7-октябрь — физика боюнча лауреат жарыяланат;
• 8-октябрь — химия боюнча;
• 9-октябрь — адабият боюнча;
• 10-октябрь — тынчтык боюнча лауреат Осло шаарында белгилүү болот;
• 13-октябрь — экономика жаатындагы лауреат.