Ош жана Каракол шаарларынын мэриялары тажрыйба алмашууда

Бүгүн, 7-октябрда Ош шаарынын мэриясына Каракол шаарынын мэриясынан делегация келди. 3 күн ичинде эки шаардагы жергиликтүү өз алдынча башкаруу органдарынын ортосунда тажрыйба алмашуу иш-чаралары өткөрүлөт. Бул тууралуу шаардык мэриядан билдиришти.

Алгачкы күнү мэрдин орун басарлары, шаардык кеңештин төрагасы, мэриянын бөлүм башчылары жана мекеме-ишканалардын жетекчилеринин катышуусунда жыйын өтүп, Ош шаарынын мэриясынын ишмердүүлүгү тааныштырылды.

Жыйында Ош шаарынын 9 ай ичинде аткарылган иштери тууралуу маалымат берилди. Ошондой эле калаанын стратегиялык пландары жана жергиликтүү бюджеттин кошумча киреше булактарын түзүү багытындагы иштер, мамлекеттик-жеке жана эл аралык өнөктөштүктүн негизинде ишке ашып жаткан долбоорлор, туризм чөйрөсүндөгү жетишкендиктер тууралуу айтылды.

Алдыда мэриянын муниципалдык ишканаларынын ишмердүүлүгү менен жеринде таанышып, социалдык жана маданий обьекттерге барышат.