Ош мэриясы Каракол шаарынын мэриясына унаа белек кылды

Ош шаарына тажрыйба алмашуу максатында келген Каракол шаарынын мэриясынын делегациясына калаа башчысы Жеңишбек Токторбаев белек катары 2025-жылы чыгарылган жаңы үлгүдөгү электромобиль унаасын белек кылды. Бул тууралуу мэриянын басма сөз кызматы кабарлады.

Маалыматка ылайык, унаанын ачкычы делегацияны жетектеп келген Каракол шаарынын мэри Каныбек Адиевге тапшырылды.

Караколдон келген коноктор белек күтүүсүз болгонун билдирип, Жеңишбек Токторбаевге ыраазычылык айтышып, Ош шаарынын мэриясынын өкүлдөрүн Караколго чакырышты.

Келген топ алдыда мэриянын муниципалдык ишканаларынын ишмердүүлүгү менен жеринде таанышып, социалдык жана маданий объекттерге барышат. Ош жана Каракол шаарлары 2013-жылдан тарта боордоштук шаар катары кызматташып келет.