Кадыровдун уулу Чеченстанда өзүнүн атындагы спорт комплексин ачты

Чеченстандын башчысы Рамзан Кадыровдун 17 жаштагы уулу, Коопсуздук кеңешинин катчысы Адам Кадыров өзүнүн атындагы заманбап Dustum спорт комплексин ачты. Бул тууралуу чет элдик басылмалар жазышты.

Майрамдык аземдин видеолорун Надтерек районунун администрациясынын башчысы Хамзат Хасанов өзүнүн Телеграм каналында жарыялады. Маалым болгондой, Dustum - Адам Кадыровдун лакап аты болуп саналат. Ал "дос" деген маанини билдирет.

Хасанов белгилегендей, комплекс зманбап техникалар менен жабдылган. Бул жерде ар кандай күрөш түрлөрү боюнча машыгуу өткөрүлөт. Ошондой эле функционалдык жана күч машыгуу секциялары каралган.

Спорт комплекстин негиздөөчүсү жана демилгечиси UFC чемпиону Хамзат Чимаев экени айтылды.

"Бул спорт комплексин ачуу өспүрүмдөргө туура багыт берет, өз потенциалын ишке ашырууга мүмкүнчүлүк түзөт",- деп баса белгиледи Хасанов.