Жеки Чандын жаңы тасмасы Казакстанда тартылат

Легендарлуу актёр Жеки Чан "Кудайдын калканы: Ультиматум" франшизасынын төртүнчү бөлүмү менен чоң экрандарга кайтып келет. Бул тасма Казакстанда тартылат.

Маалым болгондой, Жеки Чан бул долбоорду Salem Entertainment компаниясы менен биргеликте даярдап жатат. Компания локацияларды тандаганын расмий түрдө ырастады.

"Биз Жеки Чандын Алматыга келүүсүнүн деталдарын расмий жарыялайбыз. "Кудайдын калканы: Ультиматум" фильминин төртүнчү бөлүмү Казакстанда тартылат",- деп билдиришти компаниядан.

Эске салсак, 23-сентябрда Казакстандын Алматы аэропортунан дүйнөгө белгилүү актёр Жеки Чан байкалган. 71 жаштагы киножылдыздын учактан түшүп жатканы видеого тартылып, бул социалдык тармактарга тез эле тарап кеткен. Көп өтпөй Жеки Чандын Казакстанда өзүнүн жаңы долбоорун баштоо үчүн келгени, ал тургай алдыда тартыла турган тасма үчүн тиешелүү жерлер да тандалып калганы айтылган болчу.