Грета Тунберг Израил тарабынан кыйноого кабылганын билдирди

Швециялык активист Грета Тунберг Израил тарабынан өзү жана башка активисттер кыйноого кабылганын билдирди. Бул тууралуу ал Стокгольмдо өткөн маалымат жыйынында айтты.

Грета Тунберг кандай кыйноого кабылганын тактаган жок, бирок ага таза суу берилбегенин, ал эми башка активисттерге жашоого зарыл дары-дармектер жеткирилбегенин маалымдады.

Белгилей кетсек, "Сумуд" же "Эркиндик флотилиясынан" турган 40тан ашуун кеме сентябрдын ортосунда Тунис аркылуу Газа секторуна багыт алган. Алардын максаты деңиз блокадасын бузуп, Газага гуманитардык жардам жеткирүү болгон. Бирок Израил бул кемелерди токтотуп, борттогу бардык активисттерди депортациялаган.

4-октябрда The Guardian гезити Грета Тунбергдин швед аткаминери менен болгон кат алышуусуна шилтеме берип, ал шарты жок жатаканада кармалганын жазган.

Израилдин Тышкы иштер министрлиги 5-октябрда активисттерге карата жасалган ырайымсыз мамиле тууралуу бардык дооматтарды четке каккан.