Кара-Балтада кароосуз калган үйдөн 48 жаштагы кишинин сөөгү табылды

Кара-Балта шаарында ур-токмоктон каза болгон жарандын сөөгү табылды. Бул тууралуу бүгүн, 8-октябрда Чүй облустук ички иштер башкармалыгы билдирди.

Маалыматка ылайык, 6-сентябрь күнү саат 07:29 чамасында Лермонтов көчөсүндө жайгашкан үйдөн 48 жаштагы кишинин денеси табылып, денесинде жаракаттары бар экендиги аныкталган. Аталган факт боюнча Кылмыш-жаза кодексинин 130-беренеси (Ден соолукка оор залал келтирүү) менен кылмыш иши козголгон.

Тергөөдө маркумдун туруктуу жашаган жери жок экени, аталган үйдө, тагыраагы, кароосуз калган тамда жашап жүргөндүгү такталган. Ошондой эле мурунку күнү белгисиз жаран менен алкоголдук ичимдигин ичип жүргөндүгү аныкталган.

Натыйжада шектүү катары мурда соттолгон 33 жаштагы киши кармалып, убактылуу кармоо жайына киргизилген. Кылмыш иши боюнча соттук экспертизалар дайындалып, тийиштүү тергөө иштери уланууда.