"Чаташтырып жатышат". БШК төрагасы аралыктан добуш берүүнү түшүндүрдү

Жогорку Кеңештин депутаттарын мөөнөтүнөн мурда шайлоодо аралыктан добуш берүү ыкмасы колдонулат. Бул тууралуу Борбордук шайлоо комиссиясынын төрагасы Тынчтык Шайназаров бүгүн, 8-октябрда өткөн маалымат жыйынында айтты.

Ал билдиргендей, айрымдар аралыктан добуш берүүнү электрондук добуш берүү менен чаташтырып жатышат.

"Дагы бир жолу баса белгилеп кетейин, биздин өлкөдө электрондук добуш берүү жок, бул келечектин иши. Аралыктан добуш берүүнүн электрондук добуш берүүдөн айырмасы - шайлоочунун шайлоо тилкесине өзү жеке келип катышуусу талап кылынат.

Шайлоочулардын тизмесинде катталган жаран эч кандай бюрократиялык тоскоолдуксуз каалаган шайлоо тилкесинде добуш бере алат",- деди Шайназаров.

Маалымат үчүн: Парламентке кезексиз шайлоо ушул жылдын 30-ноябрында өтөт. Өлкөдө 30 округ түзүлгөн, ар бир округдан парламентке үчтөн депутат шайланат.