180 миң адам эвакуацияланган. АКШда токой өртүн уюштурган шектүү кармалды

29 жаштагы Жонатан Риндеркнехт Калифорния тарыхындагы эң кыйратуучу токой өрттөрүнүн бирине себепчи болгон, атайылап өрт койгон деп айыпталууда.

Тергөөнүн маалыматы боюнча, Риндеркнехт Жаңы жылдын алдында Пасифик-Палисейдс районунда от жаккыч менен чөптү өрттөгөн. От күчөп кетип, 9300 гектар жерди жана 8 000ге жакын үйдү жок кылган.

Бул өрттүн кесепетинен 11 адам каза болуп, 180 миң тургун эвакуацияланган. Бийликтин маалыматы боюнча, жалпы зыян 150 миллиард доллардан ашкан.

Өрт башталган түнү Риндеркнехт Uber айдоочусу болуп иштеп жаткан. Анын жүргүнчүлөрү ал тынчсызданып, ачууланып жүргөнүн байкашкан. Өрттөн кийин ал качып кетүүгө аракет кылган, бирок кайра кайтып келип, өрттүн сүрөттөрүн тартып, 911 кызматына чалган, бирок ал кезде отту токтотуу мүмкүн эмес болчу.

Тергөөдө табылган далилдер арасында анын түзмөктөрүндө ChatGPT аркылуу түзүлгөн жалындап жаткан шаардын сүрөтү, геолокация маалыматтары, Google жана YouTube жазуулары бар.

Жонатан Риндеркнехт учурда камакта. Эгер күнөөлүү деп табылса, ал 20 жылга чейин эркинен ажыратылышы мүмкүн.