Израил ХАМАС менен тынчтык келишими жарыяланган соң Газага сокку урду

Израил ХАМАС менен тынчтык макулдашуулары жарыяланган соң Газа тилкесине сокку урду. Бул тууралуу анклавдагы жарандык коргонуу кызматына шилтеме берип чет элдик басылмалар жазышууда.

Маалыматка ылайык, түн ичинде ок атышууну токтотуу боюнча макулдашуу жарыялангандан кийин бир нече жарылуу тууралуу билдирүүлөр түшкөн. Газа шаары интенсивдүү аба соккуларына кабылганы белгиленди.

Буга чейин АКШнын президенти Дональд Трамп Израил менен ХАМАСтын тынчтык планынын биринчи баскычы боюнча макулдашууга кол койгонун жарыялаган.

Анын айтымында, бул бардык туткундардын жакын арада бошотулушун жана Израил аскерлеринин макулдашылган чекке чейин артка чегинишин билдирет.

Ошондой эле, Трамп Жакынкы Чыгышка пландалган сапарынын алкагында Газа тилкесине да барышы мүмкүн экенин жокко чыгарган эмес.

Эске салсак, Катардын Тышкы иштер министрлиги Газада согушту токтотуунун жана гуманитардык жардам киргизүүнүн биринчи этабы боюнча келишимге жетишилгенин билдирген.