Мээрим Жуманазарованын машыктыруучусу Чынарбек Изабеков Дүйнө чемпиону болду

Чынарбек Изабеков Венгриянын Татабания шаарында өтүп жаткан ардагерлер арасындагы күрөш боюнча Дүйнө чемпиондугунда алтын байге утту. Бул тууралуу өлкөнүн Күрөш федерациясынан билдиришти.

Ал 51-55 жаштардагы спортчулар менен 100 килограммга чейинки салмак категориясында күч сынашкан. Изабеков алгачкы беттешинде молдовалык атаандашын 9:3 эсебинде жеңсе, чейрек финалда италиялыкты 10:0 эсебинде уткан. Андан соң финалга чыгуу үчүн түркиялык балбанды 3:0 эсебинде жеңип алган.

Чечүүчү беттеште Изабеков америкалык Элвин Риггсти 6:2 эсебинде утуп, Дүйнө чемпиону аталды.

Муну менен Чынарбек Изабеков ардагерлер арасында дүйнөнүн 5 жолку чемпиону болду. Ал буга чейин 2015, 2016, 2021 жана 2022-жылдары чемпиондук наамга ээ болгон.

Айта кетсек, Изабеков Олимпиаданын күмүш жана коло байгелеринин ээси Мээрим Жуманазарованын машыктыруучусу.