Индияда 17 баланын өлүмүнөн кийин жөтөлгө каршы зыяндуу сироптор аныкталды

Индиянын бийлиги акыркы бир ай ичинде кеминде 17 баланын өлүмүнөн кийин жөтөлгө каршы сироптун курамынан уулуу зат табышкан. Бул тууралуу чет элдик басылмалар жазышты.

Маалым болгондой, аталган сироп Тамилнад штатындагы Sresan Pharmaceutical компаниясы тарабынан өндүрүлгөн. Анализдер көрсөткөндөй, сиропто диэтиленгликолдун деңгээли 48,6 пайызды түзгөн, ал эми анын уруксат берилген чеги болгону 0,1 пайыз экени айтылды.

Учурда дарыны чыгарууга тыюу салынып, компаниянын ээси камакка алынган.

Ошондой эле көзөмөлдөө органдары Гужарат штатында чыгарылган Respifresh TR жана ReLife аттуу сиропторду да колдонбоого чакырышкан. Бул дарыларда дагы уулуу заттын деңгээли нормадан ашкан.

Индия бийлигинин маалыматына караганда, бул сироптор расмий түрдө экспорттолгон эмес. Бирок Дүйнөлүк саламаттык сактоо уюму алардын бейрасмий жолдор менен башка өлкөлөргө тарашы мүмкүн экенин эскертти.